( 12.30 pm ) ශ්‍රී ලංකීය සංචාරක ක්ෂේත්‍රයට සහ ගුවන් සේවා ඉතිහාසයට සුවිශේෂී සන්ධිස්ථානයක් එක් කරමින්, එංගලන්තයේ ජාතික ගුවන් සේවය වන British Airways ආයතනය වසර 11 ක දීර්ඝ විරාමයකින් පසු යළිත් මෙරටට සිය ගුවන් ගමන් ආරම්භ කිරීමට නියමිතව තිබේ.
මෙම ශීත සෘතු (Seasonal) ගුවන් වාර යටතේ, එංගලන්තයේ ලන්ඩන් ගැට්වික් (London Gatwick – LGW) ගුවන්තොටුපළ සහ කටුනායක බණ්ඩාරනායක ජාත්‍යන්තර ගුවන්තොටුපළ (CMB) අතර සෘජු ගුවන් ගමන් ක්‍රියාත්මක කෙරේ.
විශේෂාංග හා ගුවන් ගමන් කාලසටහන:
- ආරම්භක දිනය: 2026 ඔක්තෝම්බර් 23 වන දින
- භාවිත වන ගුවන් යානා වර්ගය: දුර ගමන් සඳහා විශේෂිත වූ විශාල බද සහිත (Wide-body) Boeing 777 ගුවන් යානයක්
- සංඛ්‍යාතය: සතියකට දින තුනක් (සඳුදා, බදාදා සහ සිකුරාදා දිනවල ලන්ඩන් සිට කොළඹට)
ගුවන් ගමන් කාල සටහන මෙන්න:
- ලන්ඩන් ගැට්වික් සිට කොළඹට (BA 2045):
- පිටත්වීම: සඳුදා, බදාදා සහ සිකුරාදා දිනවල පස්වරු 17:30 ට (ලන්ඩන් වෙලාවෙන්)
- පැමිණීම: පසුදින උදෑසන 09:00 ට (ශ්‍රී ලංකා වෙලාවෙන්)
- කොළඹ සිට ලන්ඩන් ගැට්වික් වෙත (BA 2044):
- පිටත්වීම: අඟහරුවාදා, බ්‍යාස්පතින්දා සහ සෙනසුරාදා දිනවල උදෑසන 11:00 ට (ශ්‍රී ලංකා වෙලාවෙන්)
- පැමිණීම: එදින සවස 17:00 ට (ලන්ඩන් වෙලාවෙන්)
දිගු කලකට පසු යුරෝපා කලාපයේ ප්‍රමුඛ පෙළේ ගුවන් සේවයක් මෙලෙස දිවයිනට පැමිණීම මෙරට සංචාරක කර්මාන්තයේ ප්‍රබල නැගීසිටීමකට මෙන්ම මගී ප්‍රවාහනයට මහත් පිටුවහලක් වනු ඇත.
