ඉරානය සමඟ පවතින යුදමය වාතාවරණය හමුවේ 14 වන ලියෝ පාප් වහන්සේ අනුගමනය කරන ස්ථාවරය දැඩි ලෙස විවේචනය කිරීමට ඇමරිකානු ජනාධිපති ඩොනල්ඩ් ට්රම්ප් කටයුතු කර ඇති ආකාරය CNN වාර්තා කරයි. සිය ‘ටෲත් සෝෂල්’ (Truth Social) ගිණුමේ සටහනක් තබමින් සහ මාධ්යවේදීන් අමතමින් ජනාධිපතිවරයා පවසා ඇත්තේ පාප් වහන්සේ විදේශ ප්රතිපත්තිය සම්බන්ධයෙන් ඉතා දුර්වල මට්ටමක පසුවන බවයි.
“න්යෂ්ටික අවි පවත්වාගෙන යාම සුදුසු යැයි පවසන පාප් වහන්සේ නමකට අප කැමති නැහැ. ලෝකය විනාශ කිරීමට බලාපොරොත්තුවෙන් න්යෂ්ටික අවි නිපදවන රටවල් සමඟ සෙල්ලම් නොකළ යුතු බව එතුමා වටහාගෙන නැහැ,” යනුවෙන් ට්රම්ප් සඳහන් කළේය. එසේම තමන් ලියෝ පාප් වහන්සේගේ ක්රියාකලාපය පිළිබඳ කිසිසේත්ම පැහැදීමකින් නොසිටින බව ද ඔහු අවධාරණය කළේය.
පළමු ඇමරිකානු පාප් වහන්සේ ලෙස ඉතිහාසයට එක්වූ ලියෝ පාප් වහන්සේ, මෑතකාලීනව ඇමරිකාව සහ ඉරානය අතර පවතින ගැටුම්කාරී තත්ත්වය පිළිබඳව විවෘතව අදහස් දක්වමින් සිටිති. විශේෂයෙන්ම ඉරාන ජනතාවට එරෙහිව ට්රම්ප් සිදුකරන තර්ජනාත්මක ප්රකාශ “කිසිසේත්ම පිළිගත නොහැකි” බව පාප් වහන්සේ පසුගිය සතියේදී හෙළා දැක තිබුණි.
මෙයට ප්රතිචාර දක්වමින් ජනාධිපති ට්රම්ප් ජොයින්ට් බේස් ඇන්ඩෲස්හිදී මාධ්ය වෙත අදහස් දක්වමින් කියා සිටියේ, ලියෝ පාප් වහන්සේ අපරාධ මර්දනය සම්බන්ධයෙන් මෙන්ම විදේශ ප්රතිපත්තිය අතින් ද අසාර්ථක බවයි. ඇමරිකාව වෙනිසියුලාවට ප්රහාර එල්ල කිරීම විවේචනය කරන හෝ ඇමරිකානු ජනාධිපතිවරයාව ප්රසිද්ධියේ විවේචනය කරන පාප් වහන්සේ නමකගේ ස්ථාවරය තමන් අනුමත නොකරන බව ද ට්රම්ප් පවසා ඇත.
තවදුරටත් අදහස් දැක්වූ ට්රම්ප්, ලියෝ පාප් වහන්සේ එම ධුරයට පත්වීම පිටුපස දේශපාලන අරමුණක් ඇති බවට ද චෝදනා කළේය. “එතුමා පාප් ධුරය සඳහා වන කිසිදු ලැයිස්තුවක සිටියේ නැහැ. එතුමා ඇමරිකානුවෙකු වූ නිසාම සභාව විසින් එම ධුරයට පත් කළේ ඩොනල්ඩ් ට්රම්ප් සමඟ ගනුදෙනු කිරීමට ඇති හොඳම ක්රමය එය යැයි සිතූ නිසයි,” යනුවෙන් ජනාධිපතිවරයා වැඩිදුරටත් ප්රකාශ කර තිබේ.
