කොළඹ වරායේ නැගෙනහිර පර්යන්තය පුද්ගලීකරණය කිරීම සඳහා මේ වන විට විෂය භාර ඇමති ජොන්ස්ටන් ප්‍රනාන්දු මහතා විසින් කැබිනට් පත්‍රිකාවක් ඉදිරිපත් කර ඇති බව වරාය වෘත්තීය සමිති චෝදනා කරන බව විමල් විරවංශට අයත් ලංකා සි නිව්ස් වෙබ් අඩවිය වාර්ථා කොට තිබේ. එහි වැඩිදුරටත් සදහන් වන්නේ ඊට විරෝධය පාමින් වරාය වෘත්තීය සමිති විසින් ඊයේ දිනයේ වැඩවර්ජනයක් ආරම්භකර ඇති බවය.
එම වැඩවර්ජනය සඳහා අනුශාසනා කිරීමට පූජ්‍ය ඇල්ලේ ගුණවංශ හිමියන්ද එක් වූ අතර උන්වහන්සේ වර්ජකයන්ගේ අත් වල කලු පටි බැඳීමෙන් කළු සතියක් ප්‍රකාශයට පත් කරන ලදී.
උන්වහන්සේ එහිදී කියා සිටියේ ගෝඨාභය රාජපක්ෂ මහතා ජනාධිපතිවරයා බවට පත් කිරීමටත් තමන් වහන්සේලා ද ඉතා වුවමනාවෙන් වැඩ කළ ද මේ ආකාරයේ දේවල් බලාපොරොත්තු නොවූ බවයි.
ආණ්ඩුවට ඉතා සීමිත කෙටි කාලයක් තවත් ලබාදෙන බවත් මේ ආකාරයෙන් ජාතික සම්පත් විකුණා දැමීමට කටයුතු කළ හොත් ආණ්ඩුව හැදීමට මහන්සි වූවා සේම ඊට විරුද්ධ වේදිකාවේ නැගීමට ද පසුබට නොවන බව උන්වහන්සේ කියා සිටියහ.
