දෙමළ මාධ්‍යවේදීන් දෙදෙනකුට පහර දුන් බව පිළිගත් සැකකරුවකුට ඇප ලබාදීම අධිකරණය විසින් ප්‍රතික්ෂේප කර තිබේ.
මාධ්‍යවේදීන් දෙදෙනාට පහරදීම සම්බන්ධයෙන් සමාව දෙන ලෙස ප්‍රධාන සැකකරු යෝගේෂ්වරන් අනුජන් ඉල්ලා සිටියේ වීඩියෝ තාක්ෂනය යොදාගනිමින් අධිකරණ කටයුතු වලට සම්බන්ධ වෙමිනි.
ඔහුට ඇප ලබාදෙන ලෙස නීතිඥයන් විසින් කරන ලද ඉල්ලීමට විරෝධය පාමින් ෂන්මුගම් තවසීලන් සහ කනපතිපිල්ලේ කුමනන් මාධ්‍යවේදීන් වෙනුවෙන් පෙනී සිටි ජනාධිපති නීතිඥ එම් ඒ සුමන්දිරන් අධිකරණයට පෙන්වා දී ඇත්තේ මෙම පහරදීම සමාජයට බලපාන ප්‍රශ්නයක් අනාවරණය කිරීමට විරුද්ධව කරන ලද්දක් විනා පුද්ගලික ආරාවුලක් නිසා සිදු වූවක් නොවන බවයි.
“මේක සමාජ විරෝධී අපරාධයක් හෙළිදරව් කරන්න යාමේදී ඔවුන්ට එරෙහිව සිදු කරන ලද පහර දීමක්,” බව අධිකරණයට පහදා දුන් බව ජනාධිපති නීතිඥ සුමන්දිරන් නඩු විභාගය අවසානයේ මාධ්‍යවේදීන්ට කියා සිටියේය.
“මේක සමාජ විරෝධී අපරාධයක් හෙළිදරව් කරන්න යාමේදී ඔවුන්ට එරෙහිව සිදු කරන ලද පහර දීමක්,” බව අධිකරණයට පහදා දුන් බව ජනාධිපති නීතිඥ සුමන්දිරන් නඩු විභාගය අවසානයේ මාධ්‍යවේදීන්ට කියා සිටියේය.
“වන විනාශයක් සිදුවෙමින් පවතිද්දී වන සංරක්ෂණ නිලධාරීන් ඊට එරෙහිව කිසිදු පියවරක් නොගෙන හිඳීමත්, පොලිසිය පියවර නොගෙන සිටීමත් හෙළිදරව් කරන්න ගියාම තමයි ඔවුන් මෙම පහර දීමට ලක් වුනේ.”
මුලතිව් වන රක්ෂිතයට යාබදව සැකකරුවන් විසින් නීත්‍යානුකුලව ගස් කපන ඉඩමකට මාධ්‍යවේදීන් දෙදෙනා බලහත්කාරයෙන් ඇතුල් වු බව සනාථ කිරීමට චූදිතයන් වෙනුවෙන් පෙනී සිටි නීතිඥයන් අධිකරණය හමුවේ කරුණු දක්වා තිබේ.
කරුණු සලකා බැලු මුලතිව් දිසා විනිසුරු එස්. ලෙනින්කුමාර්, යෝගේෂ්වරන් අනුජන්, කුමාරවේල් සෞන්දකුමාර් සහ මහේන්ද්‍රන් ලෝකීසන් යන සැකකරුවන් තිදෙනා නොවැම්බර් 17 දක්වා රක්ෂිත බන්ධනාගාර ගත කරන ලෙස නියෝග කර තිබේ.
කැලෑ කොල්ලයේ තොරතුරු අනාවරණය කිරීමේ යෙදී සිටි දෙමළ මාධ්‍යවේදීන් දෙදෙනාට පහර දීම සම්බන්ධයෙන් ඔවුන් සමග අත්අඩංගුවට ගෙන රිමාන්ඩ් ගත කර සිටි නෝර්වේ පුරවැසියකු වු ඔස්ලෝ වාසී තිශාන්තන් රාජේන්ද්‍රන්ට මුලතිව් උසාවිය විසින් පසුගියදා ඇප නියම කර තිබුනි.
දෙමළ මාධ්‍යවේදීන් දෙදෙනාට පහර දීම සම්බන්ධයෙන් අත්අඩංගුවට ගෙන රිමාන්ඩ් ගත කර සිටි නෝර්වේ පුරවැසියකු වු ඔස්ලෝ වාසී තිශාන්තන් රාජේන්ද්‍රන්ට මුලතිව් උසාවිය විසින් පසුගියදා ඇප නියම කර තිබුනි.
කනපතිපිල්ලෙයි කුමනන් සහ ශන්මුගම් තවසීලන් යන මාධ්‍යවේදීන් දෙදෙනාට ඔක්තෝබර් 12 වැනි දා අමානුෂික ලෙස පහර දීම, ඔවුන්ට මරණ තර්ජන එල්ල කිරීම හා වන රක්ෂිතය තුළ නීතිවිරෝධී දැව ජාවාරම සම්බන්ධයෙන් පටිගත කොට ඇති වීඩියෝ සාක්ෂි ඉවත් කිරීම යන චෝදනා සැකකරුවන්ට එරෙහිව එල්ල වී තිබේ.
මුහුදුබඩපත්තු ප්‍රාදේශීය ලේකම් කාර්යාලය වෙත තොරතුරු දැනගැනීමේ පනත යටතේ අයදුම්පතක් ඉදිරිපත් කරමින් යෝගේෂ්වරන් අනුජන්ට අයත් බව පවසන කම්බි ගැසු තේක්ක දඬු වැටකින් වටකළ එළි පෙහෙළි කළ ඉඩමක් සම්බන්ධයෙන් මාධ්‍යවේදීන් දෙදෙනා කළ විමසීමකදී අනාවරණය වී ඇත්තේ එම ඉඩම හෝ ඒ අවට කිසිදු ඉඩමක් හෝ ඔහුට අයිති නොමැති බවයි.
ඒ සම්බන්ධ තොරතුරු දිසා විනිසුරු වෙත වාර්තා කිරීමටත් නීතිඥයන් කටයුතු කර තිබේ.
මාධ්‍යවේදීන් දෙදෙනාට පහර දිමේ විමර්ශනය පිළිබඳ වාර්තාවේ අඩුපාඩු සම්බන්ධයෙන් පොලිස් නිලධාරීන් අධිකරණයේ දෝෂ දර්ශනයට ලක්වූ බව ප්‍රදේශයේ මාධ්‍යවේදීහු පවසති.
නිසි ලෙස කරුණු වාර්තා කිරීමට නොහැකි නම් ඒ බව අධිකරණයට දැනුම් දෙන ලෙස අවවාද කර ඇති විනිසුරුවරයා, පොලීසියේ උසස් නිලධාරීන්ට දන්වා විමර්ශනය සඳහා වෙනම නිලධාරීන් පිරිසක් පත් කර ගත හැකි බව අවධාරණය කර තිබේ.
”නඩු විභාගයෙන් අනතුරුව දෙමළ ජාතික සන්ධාන මන්ත්‍රීවරයා පැවසුවේ යුද සමයේ සිට විවිධාකාර ප්‍රහාරවලට ගොදුරුවී මරුමුවට පත් වුවන් ඇතුළු කිසිදු දෙමළ මාධ්‍යවේදියකුට මේතාක් යුක්තිය ඉටුවී නැති හෙයින් ජාත්‍යන්තර තලයේ ඒ සම්බන්ධයෙන් හඬක් නගන්නට පියවර ගන්නා බවයි.”
නඩු විභාගයෙන් අනතුරුව දෙමළ ජාතික සන්ධාන මන්ත්‍රීවරයා පැවසුවේ යුද සමයේ සිට විවිධාකාර ප්‍රහාරවලට ගොදුරුවී මරුමුවට පත් වුවන් ඇතුළු කිසිදු දෙමළ මාධ්‍යවේදියකුට මේතාක් යුක්තිය ඉටුවී නැති හෙයින් ජාත්‍යන්තර තලයේ ඒ සම්බන්ධයෙන් හඬක් නගන්නට පියවර ගන්නා බවයි.
theleader.lk